MELAYÊ CIZIRÎ
Dil yek e dê ‘işqi yek bit ‘aşiqan yek yari bes
Qible dê yek bit qulûban dilberek dildari bes
Min di benda zulfekî dil da bi destê pîrê ‘işq
Lew di ‘işqê da ku best îhram û yek zunnari bes
Terh û terzê bûne zunnar û çelîpa yek bi yek
Lew mi zunnar û çelîpa yek tinê yek cari bes
Hin ji nik dêrê ve tên qesta keniştê hin dikin
Ney ji van im ney ji wan im min derê xemmari bes
Ger çi tên reqs û semayê her seher sed neyşeker
Min di bezma surşîrînan ew şîrînreftari bes
Weh çi walagewher in hatin lîbasê cism û can
Min ji wan horîsiriştan ew perîruxsari bes
Hewce sihrê Samirî nînin ku zulfa reş bikit
Çeşmê benda dilrubayan kagula ‘eyyari bes
Bulbulan sed gul di çav in çav li sed gul dî dikin
Min di baxê gul‘uzaran yek gul û gulnari bes
Min di baxê gulfiroşan dî ‘eceb resmek xerîb
Xariteb‘an gul di dest in gulperistan xari bes
Ew cefa çû der ji hed zulma te bir hetta bi Çîn
Rehmekê carek nekî hey zalim ev azari bes
Xerqê deryayê gunah în teşneê lutfa heq în
Rehmetê Amirzîgar û şefqeê Xeffari bes
Ehlê dunyayê seranser dijminên min bin Mela
Piştemêrê min ‘Elî bê Heyderê Kerrari bes